Hommaz a Kaya

Mo ti ena 15 ans kan to fine perdi lavie. Mo pa ti conne toi, ni to lamizik. Ca zour la, banla ti dire moi ena bagarre lor simin, acoz enn prisonnier fine mort dan prison. Mo pa ti compren kifer dimoune ti p revolter, kifer zot ti p met desorde.  Banla ti dire moi ban creoles p dessane lor lari, p brile la roue, p craz partout. Ca ti fer moi bien encolere. Mo pa ti p compren kifer acoz 1 dimoune ti mort dan prison, autant lezot ti p souffert. Ena ban kine perdi lavi. Acoz demagozie ban politiciens, acoz cover-up radio ek television, mo pa ti conne la vérité, … mo pa ti coner kisanla Kaya.  Enfin, ca enn episode bien noir pou nous pays. Mais tigit tigit, mo lizier fine ouvert.

Zordi, apres boucou letemps, mo ti envi rende toi enn hommaz pou to lamizik, pou paroles ki tone ecrire dan to ban santer, pou ca zom ki to ti eter.. Tou zom ena so defaut, tou zom fer errer, mais pa pou ca ki ou fer disang couler, ou prend lavie dimoune. Ca crime la li pa nek enn crime envers enn fami ou envers enn communauté, li enn crime envers lepep moris. Couma zot ine cav touye enn dimoune ki ti p sante l’amour, la paix ek l’inité. Kan mo penser ki acoz n zoint mass ki tone perdi lavie, ca fer moi riyer mais mo triste en mem temps. Si zot ti coner comien dimoune fime zot ti mass, so avocat, so doctere, so grand palto. Mo pa p vine defane consommation gandia, mo p ziss dire ki bizin arete ca gros l’hypocrisie ki ena autour li. Zordi mo pa dans mo pays ek kan mo ecoute to ban santer, ca fer moi mari fier ki mone né dans moris, ki mo coz langaze creol ek ki mo ena ca kiltir mo pays la. Mone né malbar ek kan mo ti zen, ti ena ban pression parsi parla ki ti empesse moi decouvert ban artistes couma toi. Mo triste ki mo pa fine vraimen conne toi avant ki mone kit lekol mais mone decouvert ki lamizik pa guete to relizion, to l’oririzine ek to coulere lapo. Kan mo tende enn sega ou enn seggae, ca fer lekor vibrer. ca li dan nou disang ca, morisien..

Mo fini la mem. Hommaz a toi.

Ek pou ban rare dimounes ki lire ca blog la, mo ti envi partaz Kaya so Zistwar Revoltant r zot.